Ziyarat E Naahiyah

Yeh Imam-e Zamana (a.t.f.s) se waarid Sayyedush Shohadaa Hazrat Imam Husain (a.s) ki behtareen aur buland mafaheem, dard-naak wo dil-soz ziyarat hai. Jo Momin is ziyarat ko khuloose dil se Imam Husain (a.s) ki azamat wo daastane shahadat ko madde nazar rakh kar padhe ga, Khuda usey Imam (a.s) ke behtareen zayereen aur saathiyo’n mein qaraar dega, aur uski duniya wo aakherat ki tamaam haajato’n ko puri farmayega. Insha-Allah (Aameen)

(Shuru karta hoo’n mai’n) Allah ke naam se Jo bada maherbaan aur rahem karne wala hai.

Salaam ho Hazrat Aadam par jo Khuda ke barguzeeda (banda-e khaas) aur khaleefa hai. Salaam ho Hazrat Shees par jo Wali-e Khuda aur Uske nek bando’n mein se hai. Salaam ho Hazrat Idrees par jo apni Hujjat-o-daleel ke saath Jannat mein muqeem hai. Salaam ho Hazrat Nooh par jinki dua qubool ki gayee. Salaam ho Hazrat Hood par jinki Allah ki taraf se makhsoos madad ki gayee. Salaam ho Hazrat Saaleh par jinko Allah ne Apne fazl-o-karam se zee-shaan (buland martabe wala) qaraar diya. Salaam ho Hazrat Ibraheem par jinko Allah ne Apni khullat se sarfaraz kiya (dosti se nawaza). Salaam ho Hazrat Ismaeel par jinko Allah ne Apni Jannat se zibhe azeem ka fidya qaraar diya. Salaam ho Hazrat Ishaaq par jinki zurriyat mein Allah ne Nabuwat ka silsila rakkha.

Salaam ho Hazrat Yaqoob par jinko Allah ne Apni rehmat se dobara beenayee (eye-sight) di. Salaam ho Hazrat Yusuf par jinko Allah ne Apni karam-o-azmat se kuwe’n se najaat di. Salaam ho Hazrat Moosa par jinke liye Allah ne Apni qudrat se darya (river) ko shigaaf kiya. Salaam ho Hazrat Haaroon par jinko Allah ne Apni Nabuwat se makhsoos farmaya. Salaam ho Hazrat Shoyeb par jinko Allah ne unki ummat par ghalaba ataa kiya. Salaam ho Hazrat Dawood par jinke tarke-aula ko Allah ne moaaf farmaya. Salaam ho Hazrat Sulaimaan par jinke liye Allah ki di huwi izzat ki ba-daulat Qaum-e Jin taabe ho gayee.

Salaam ho Hazrat Ayyub par jinko Allah ne beemari se shifa di. Salaam ho Hazrat Yunus par Allah ne unke us waa’de ko pura kiya jiski unho’n ne zamanat li thi. Salaam ho Hazrat Zakariya par jo apni shadeed aazmaaish mein bhi saabir rahe (sabr karte rahe). Salaam ho Hazrat Yahya par jinka martaba Allah ne unki shahadat se aur bada diya. Salaam ho Hazrat Uzair par jinko Allah ne marne ke baad dobara zinda kiya. Salaam ho Hazrat Isa par jo Roohe Khuda aur uske kalema hai.

Salaam ho Hazrat Mohammad Mustafa (s.a.w.s) par jo Allah ke Habeeb aur Uske pasandeeda hai. Salaam ho Hazrat Ameerul Momineen Ali ibne Abi Talib (a.s) par jinko Allah ne paigambar ke bhai hone ka makhsoos sharaf ataa kiya. Salaam ho Hazrat Fatema Zahra Dukhtar-e Rasool (s.a.w.s) par. Salaam ho Abu Mohammad Hazrat Hasane Mujtaba par jo apne baap ke Wasi wo Ja-nasheen hai. Salaam ho Hazrat Husain par jinho’n ne raahe Khuda mein shadeed zakhmi haalat mein apni jaan pesh kar di. Salaam ho uspar jinho’n ne zaahiri aur baatini taur par Khuda ki ibaadat ki.

Salaam ho uspar jiski turbat (khaak) mein Allah ne shifa qaraar di. Salaam ho uspar keh jiske Qubba (gumbad/dome) ke neeche duae’n qubool hoti hai. Salaam ho uspar keh jiski zurriyat mein se (Qayamat tak ke liye) Imam honghe. Salaam ho farzande Khatemul Ambiyaa (s.a.w.s) par. Salaam ho sardaare ausiyaa Hazrat Ali (a.s) ke farzand par. Salaam ho farzande Fatema Zahra (s.a) par. Salaam ho farzande Khadeejatul Kubra (s.a) par. Salaam ho farzande Sidratul-Muntaha (Poole Seraat ki aakheri manzil jiske baad Jannat hai usko sidratul-muntaha kahte hai) ke waaris par. Salaam ho farzande Jannatul-Mawa par (Jannat jaisi panah-gah ke waaris par).

Salaam ho farzande Zamzam-o-Safa par. Salaam ho khaak-wo-khoon mein aaluda (jism) par. Salaam ho unpar jinki be-hurmati ki gayee. Salaam ho Ashaabe Kisaa (Chaadar-e Tatheer walo’n) ke paanchwe’n fard par. Salaam ho Ghareebul-Gorabaa (be-watan pardesi) par. Salaam ho shaheedo’n mein sab se zeyada pur-dard Shaheed par. Salaam ho uspar jisey majhoolun-nasab (jis-keh baap ka pata na ho) logo’n ne qatl kiya. Salaam ho saakin-e Arze Karbala par (zameen-e Karbala mein ba-se huwe par). Salaam ho uspar jis par aasmaan ke farishte roye. Salaam ho uspar jiski zurriyat ko Khuda ne paak-o-pakeeza qaraar diya. Salaam ho deen ke sardaar par. Salaam ho un logo’n par jo daleelo’n ki manzil hai. Salaam ho un Ayemma (a.s) par jo saadaat mein se hai.

Salaam un ghareebul watano’n par jo khoon mein lat-pat thay (khoon bhare gareebaan par). Salaam un hoto’n (lips) par jo pyaas se sukhe huwe thay. Salaam ho un nafso’n par jinhe’n tukde tukde kiye gaye. Salaam ho un Arwaah (Rooho’n) par jinhe’n qatl (shahaadat) ke baad loot liya gaya. Salaam ho (uryaa’n) be-gor wo kafan laasho’n par. Salaam ho Zameen-e Karbala pe behte huwe khoono’n par. Salaam ho unke (shaheedo’n ke) badan ke tukde tukde aaza’a (parts of body) par. Salaam ho un saro’n (heads) par jinhe’n nayzo’n par buland kiya gaya. Salaam ho un masturaat par jinke saro’n se chaadare’n chheen li gayee’n.

Salaam ho Hujjat-e Khuda (hujjate parwardegaare aalam) par. Salaam ho aap par aur aap ke shaheed hone wale farzando’n par. Salaam ho aap par aur haq ki himayat karne wali aap ki zurriyat par. Salaam ho aap par aur aap ke pahlu mein rahne wale farishto’n par. Salaam ho zulm-o-sitam ke saath qatl kiye jaane wale par. Salaam ho unke bhai Hasan par jinhe’n zaher de kar shaheed kiya gaya. Salaam ho Janabe Ali Akbar par aur kam-sin sheer-khwaar (Ali Asgar) par.

Salaam ho un jismo’n par jinhe’n baad-e shahadat loota gaya. Salaam ho Nabi-e Kareem (s.a.w.s) ki qareeb-tareen zurriyat par. Salaam ho un laasho’n par jinhe’n bayabaa’n mein (khoon mein lat-pat) pada chhod diya gaya. Salaam ho un musaafiro’n par jinhe’n apne watan se dur kar diya gaya. Salaam ho un shaheedo’n par jinhe’n be-gor wo kafan chhod diya gaya. Salaam ho un saro’n par jinko jismo’n se juda kar diya gaya. Raahe Khuda mein aziyat uthaane (bardaasht karne) wale saabir (sabr karne wale) par salaam. Aalam-e be-kasi mein (be-yaar wo madadgaar) zulm ke saath shaheed kiye jaane wale par salaam. Khaak-e-paak par rahne wale par salaam. Qubba-e buland (buland-ghumbad) rakhne wale par salaam.

Salaam ho uspar jisko Khudaye buzurg ne paak-o-pakeeza qaraar diya. Salaam ho us par jis-par Jibraeel (a.s) ne fakhr kiya. Salaam ho us par jisey Mikaeel (a.s) ne gahware mein loriyaa’n soonayee. Salaam ho uspar jiske baare mein Ahed-o-Paymaan ko tod diya gaya. Salaam ho uspar jiski hurmat ko zaaye kiya gaya. Salaam ho uspar jiska khoon-e na-haq bahaya gaya. Salaam ho uspar jisey zakhmo’n se behte huwe khoon se nehla diya gaya. Salaam ho uspar jisey nayzo’n par phiraya gaya. Salaam ho uspar jis-par zulm-o-sitam ko rawa rakkha gaya. Salaam ho uspar jisey pas-e pusht (gardan ki taraf se) zebha kiya gaya. Salaam ho uspar jisko ghird-o-nawah (atraaf) ke gaon walo’n ne dafnaya. Salaam ho uspar jiske sheh-rag ko be-dardi se kata gaya.

Salaam ho uspar jo ek-o-tanha dushmano’n ki yalgaar (hamle) ko hata raha tha. Salaam ho us Reesh-e Mubarak (safed-dadhi) par jisey khoon se khezaab diya gaya. Salaam ho us rukhsaar (gaal) par jo khaak-aalood tha (jis-par mitti laghi huwi thi). Salaam ho us badan par jo gard aalood (full of dust) tha (jis par se kapde utaar liye gaye thay). Salaam ho un hoto’n aur dato’n par jin par zulm ki chhadi (stick) chal rahi thi. Salaam ho us sar par jisey nayze par buland kiya gaya. Salaam ho un jismo’n par jo bayabaa’n (jungle) mein barehna (bin-libaas) pade thay, aur un-par bayabani makkhiyaa’n (forest-bee) bhin-bhina rahi thi aur phaad khaane wale darinde (wild-animal) un ke atraaf mandla rahe thay.

Salaam ho aap par aur aap ke Qubbe (dome) ke atraaf jame rahne wale farishto’n par jo hamesha aap ke qabre aqdas ko ghere rehte hai aur sahne-shareef ki tawaaf karte rehte hai aur aasmano’n se aap ko ziyarat ke liye utarte rehte hai. Salaam ho aap par keh mai-ne aap ki jaanib rukh kiya hai aur aap ke nazdeek kamiyabi (aap ki baargah mein surkhru hona) chaahta hoo’n. Salaam ho aap par us shakhs ka jo aap ki hurmat (izzat-o-ehteraam) ko jaanta ho. Jo aap ki welayat mein mukhlis ho aur aap ki mohabbat ke zariye Khuda se nazdeeki chaahta ho aur aap ki dushman’n se bara’at (bezaari) ka khwaast-gaar ho. Uska salaam jiska dil aap ke gham se zakhmi hai, aur aap ke zikr soon kar uske aankho’n se ashk (tears) jaari rehte hai.

Us shakhs ka salaam jo aap par beete masaayeb se nehayat dard-mand (dukhi) malool (ghamgheen) aur be-haal hai. Uska salaam jo maidaan-e Karbala mein agar aap ke saath hota to talwaaro’n ki dhaar par apni jaan ko daal deta, aur aamada-e maut ho kar apne khoon ka aakheri qatra aap par nisaar kar deta. Aur baaghiyo’n ke muqabale mein aap ke saamne jehaad kar-ke aap ki nusrat karta. Aur apni rooh, apna jism, apna maal aur apni aulaad sab-kuch aap par fida kar deta, uski rooh aap ki rooh par nisaar hoti aur uske ahel aap ke ahel par fida hote.

Ab jab zamaane ne mujhe moakh-khar (majboor) kar diya aur us-waqt maujood na hone ki wajha se mere maqsad ne mujhe aap ki nusrat se rok diya aur aap se ladne walo’n se na lad saka, aur aap ke dushmano’n ke liye maidaan mein aa kar khada na ho saka to subh wo shaam be-qaraari se (aap ke gham mein) aap par aah-o-zaari (ghirya-wo-boqa) karoonga. Aur khoon ke badle aankho’n se (khoon ke) aansoo bahawoonga. Yeh aap ka gham, yeh aap ke masaayeb par ranj-o-malaal aur aahe-pur-dard kabhi khatam hone wali nahee’n. Isi ghamgheen haalat, ranj-o-malaal ke saath is duniya se uth jawoonga.

Maula: Mai’n gawahi deta hoo’n ke aap ne Namaaz ko qayem kiya, zakaat adaa ki, (logo’n ko) nekiyo’n ka hukm diya aur (unhe’n) buraaiyo’n aur sarkashi se roka, aap ne hamesha Khuda ki ita’at ki, kabhi uski na-farmaani nahee’n ki. Aap ne apna raabeta sadaa (hamesha) Khuda se qayem rakkha. Aur Usko apne se raazi wo khush rakkha, aur hamesha Uski na-farmaani se darte rahe. Nigahe’n hamesha Uski taraf rahi, aur Uski raza ke khaatir usi ki taraf motawajjeh rahe. Aap ne Sunnat-e Khuda wo Rasool (s.a.w.s) ko qayem kiya, aur fitno’n ki aagh ko bujhaya, dusro’n ko raahe haq ki taraf daawat di, aur haq ke raasto’n ko waazeh wo raushan kar dekhaya, aur Khuda ki raah mein jehaad ka jo haq tha usey adaa kiya.

Aap Khuda ke mutee (obedient) rahe aur apne jadd Mohammad Mustafa (s.a.w.s) ke pairo (follower) rahe, aur apne baap ke taabe-e farmaan rahe, aur apne bhai Hasan (a.s) ki wasiyyat ko jald pura kiya. Aap hi hai sutoon-e Deen ko buland karne wale, sarkashi ki buniyado’n ko khodne wale, sarkasho’n (zaalimo’n) ka qla-qama (khatam) karne wale. Ummate Paigambar (s.a.w.s) ko naseehat karne wale, aur ghamaraatul-maut (maut ke bhawar) mein tayerne wale, aur ahle fisq-o-fujoor (badkaar logo’n) ka mardaanghi se muqabala karne wale. Khuda ki hujjato’n ke saath qayem rahne wale. Islaam aur muslemeen ke liye dil mein rahem rakhne wale. Haq ki nusrat (help) karne wale, aur sakht aazmaaish (imtehaan) ke waqt sabr karne wale. Deen ki hifaazat karne wale, aur deen par hamla karne walo’n ka mooh pher (mooh-tod jawaab) dene wale.

Aap hidaayat ki taraf daawat aur uski hifaazat wo nusrat karte rahe, aur Adl wo insaaf ki nashr wo ishaa-at (publishing) karte rahe, aur deen ki nusrat wo hidaayat karte rahe. Aur deen ki haqarat (insult) karne walo’n ki rok-tok aur kaat karte rahe, Aap taaqatwar se kamzor ko uska haq dilaate thay, aur hukm mein taaqatwar wo kamzor ko barabar (nazar se) dekhte thay. Aap yateemo’n ke liye bahaar thay, logo’n ke liye jaaye-panaah thay, Islaam ki izzat thay, aap ke paas ahkaam-e ilaahi ka sarmaya tha, Aap haajat-mando’n (zarurat-mando’n) ko graan-qadr (qeemti) atiya dene mein pur azm (mazboot iraada rakhne wale) thay, apne Jadde-Amjad Rasool-e Khuda (s.a.w.s) aur Pedare-buzurgowaar (a.s) ke tareeqo’n par (naqshe-qadam par) chalne wale aur apne bhai ki tarha Amre-khair (nek-kaam) ki hidaayat farmane wale, apni zimmedariyo’n ko pura karne wale, pasandeeda khoobru wo khushboo rakhne wale, aap ki sakhawat azhar minash-shams (suraj se zeyada raushan hai) aap parda-e shab (raat ki tareeki) mein tahajjud-guzaar (Namaze Shab padhne wale), aap ka har kaam, har tareeqa mazboot wo durust (perfect) aur aap ki har seerat buzurgana (aali) shaan ki haamil, aap ki har sab-qat (pesh-qadami) azeemush-shaan aur aap ka nasab intehayee buland hai.

Aap ke kamalaat intehayee unchayee (most high) par, aap ka har martaba bulandtar, aap ke fazaayel bohot hi zeyada, aap ke sab khasayel (behavior) pasandeeda, aap ki bakhshishe’n nehayat qeemti, aap saahib-e hilm, raahe haq par gaamzan (haq par chalne wale) Khuda ki taraf maayel, shadeed-tareen sakhi. saahib-e ilm, Imam-e Ummat, gawahe haqqaniyat, millat ke liye dard mand. Khuda se lau lagaye huwe, har saahib-e dil ke maheboob (har dil azeez) Khuda ke ghazab se darne wale (khauf-e Khuda rakhne wale).

Aap farzande Rasool-e Khuda (s.a.w.s) hai, Qur’an ke liye sanad (proof) hai, ummat ke liye dast wo baazu hai. Ita’ate Khuda mein ta’ab (thakan) uthaane wale. Ahed-o-paymaan ki hifaazat karne wale, bad-kaaro’n ke raaho’n se alag-thalag, museebat-zadah ko ataa karne wale, tulaani rukoo wo sujood karne wale. Duniya ko is-tarha chhodne wale jaise duniya se rukhsat hone wale duniya se seir (dil bhar jaana) hota hai. Duniya ko aap ne hamesha nafrat ki nigah se dekha, aap ki aarzooye’n duniya se hati huwi thi, duniya ki aaraaish se aap koso’n dur thay, rownaq-e duniya se aap ki nigahe’n phiri huwi thi. Aur duniya jaanti hai keh aap ka milaan sirf aakherat ki taraf tha. Yahaa’n tak keh jab zulm-o-jour apne haath bohot badhaane laga aur zulm ke chehre par jo halka sa parda tha woh bhi na raha, gumrahi ne apne chelo’n ko har taraf se bula liya.

Us-waqt aap apne Khuda ke Haram (ghar) mein muqeem thay, zalimo’n se dur thay, gosha-nasheen thay, aur Mehraab-e ibaadat mein mahwe ibaadat thay. Duniya ki lazzato’n aur khwahisho’n se kinara-kash thay. Aur apni taaqat ke mutabiq aur imkaan ki hadh tak apne dil wo zabaan se haraam se bachne ki hidaayat bhi karte rahe. Aap se Baiyat-e Yazeed ka motaaliba (maang) huwa. Aur aap ke haqeeqat shanaas (haqeeqat ko jaanne aur pehchaanne wale) ilm ne tai kar liya ke Baiyat se inkaar ho aur Baiyat na karne ki wajha se jo log qetaal (jang) kare’n un faajiro’n se jehaad kare’n.

Fauran aap apni aulaad, Ahle khaandaan, apni farmaan-bardaar jama’at (ummat) ko le kar chale, aap ne haq aur raushan dalayel ko waazeh kar diya. Aur Khalq-e Khuda ko hikmat aur pasandeeda mouyeza (naseehat) ke saath Khuda ki taraf daawat di. Aur hudood-e shariyat ke qayem karne ka, neez (also) Ma’bood ki farmaa-bardaari ka, moharremaat se bachne aur sarkashi se baaz rahne ka hukm diya. Lekin sitamgaro’n ne zulm wo adaawat (dushmani) se aap ka muqabla kiya. Aap ne pehle to unko samjhaya aur ghazab-e Khuda se daraya aur hujjat tamaam ki. Aakhir-kaar jab unho’n ne aap ke baare mein ahed wo paimaan ko tod diya, har hukm-e Khuda ko pase-pusht (peeth ke peechhe) daal diya aur aap ki baiyat se bhi phir gaye, aur apni shaqawat se unho’n ne aap ke Khuda aur aap ke Jadde Amjad (Rasool-e Khuda s.a.w.s) ko ghazab-naak kiya aur aap se ladne ki pahel khud apni taraf se ki.

To phir aap bhi zarbe nayza wo shamseer ke liye maidaan mein aa gaye, aur bad-kaaro’n ke lashkar ko pees daala, aap jang ke gahre gubaar mein dhanse huwe zulfiqaar se Haidar-e karraar ki tarha qetaal (jang) kar rahe thay. Aadaa (dushmano’n) ne jab aap ke dil ko mazboot aur bilkul be-khauf wo hiraas dekha to aap ke liye apne makr ki jaal bichhane laghe, aur apni makhsoos Sufiyaani chalakiyo’n aur shararat ke saath aap ke saath jang karne laghe.

Maloon Umar ibne Saad ne apne lashkaro’n ko hukm de diya ke paani Husain (a.s) tak na pohonch sake. Sab log tezi ke saath aap se qetaal (jang) karne laghe, aur pai-dar-pai (step by step) mile-jule hamle hone laghe, Aap ko Teero’n se chhalni kar diya, sab ne zulm-o-sitam ke haath aap ki taraf bada diye, na unho’n ne aap ke baare mein apni kisi zimmedari ko dekha aur na sirf (yeh keh) aap ko aur aap ke saathiyo’n ko qatl karne mein, aur aap ke samaan ko lootne mein woh kitne bad-tareen gunah ke murtakib honghe.

Aap gubbaare jang mein dhanse huwe thay aur har ek aziyat utha rahe thay, aap ka sabr dekh kar to malayeka-e aflaak bhi tajjub kar rahe thay. Zaalimo’n ne har taraf se khaime ko gher liya aur zakhm par zakhm pohncha kar aap ko zakhmo’n se choor, thaki-haari haalat kar diya. Dam lene ki mohlat na di. Aap ka koi madadgaar na raha tha. Be-kasi ke aalam mein intehayee sabr wo zabt (burd-baari) ke saath apni masturaat wo aulaad ki taraf se hujoom-e ashqiyaa (zaalimo’n ke hujoom) ko hata rahe thay. Yahaa’n tak ke unho’n ne aap ko aap ki sawaari (zul-janaah) se ghira diya. Aap zakhmo’n se choor ho kar zameen par ghire. Lashkar ke ghode apne sumo’n se aap ko kuchal rahe thay, aur sarkash-sitamgar apni talware’n liye aap par chadhe aa rahe thay. Maut ka paseena aap ki peshani par aaya huwa tha, aur aap ke haath-pair idhar-udhar simat-te aur phail-te thay. Aap chashm-e neem waa (aadhi khuli huwi aankh) se apne kunbe aur apne bachcho’n ko dekh rahe thay.

Halaan-keh us-waqt aap ki khud ki haalat to aisi thi ke aap ko apne kunbe ka aur bachcho’n ka dheyaan na aa sakta tha. Us-waqt aap ka ghoda (Zul-janaah) hin-hinata aur rota huwa aap ke kheyaam ki taraf chala. Jab Ahle haram ne aap ki sawaari ko be-sawaar dekha aur zeen-e asp (Zul-janaah) ko neeche dhalka huwa dekha to be-qaraar ho kar khaimo’n se nikal pade, aur baal bikhraye huwe mooh par tamaanche maarte huwe, jab keh parde ka dheyaan na tha. Nauha wo buka (ghirya) karte huwe apne buzurgo’n aur waariso’n ko pukaarte huwe jab-keh apni us makhsoos izzat aur shaan wo shaukat ke baad hekaarat ki nazar se dekhe ja rahe thay, sab ke sab qatl-gah ki taraf tezi se jaa rahe thay.

Aah! Shimr us-waqt aap ke seene par baitha huwa tha aur apna khanjar aap ki gardan par pher raha tha. Reeshe-Mubarak zaalim apne haath mein liye huwe Apni hindi talwaar se aap ko zibha kar raha tha. Aap ke haath-pair be-harkat ho gaye, aur saans ruk gayee, nayze par sare aqdas ko uthaya gaya aur Ahle haram ko ghulaamo’n ki tarha qaid kar liya gaya. Aur aaheni (lohe ki) zanjeero’n mein jakad kar be-kajawa uoont par bethaya gaya. Din ke do-paher (afternoon) ki garmiyaa’n unke chehro’n ko jhulsa rahi thi, aur woh bayabaan wo jungalo’n mein phiraye ja rahe thay, aur unke haath gardano’n se bandhe huwe thay, aur baazaro’n mein unko phiraya ja raha tha.

Waaye ho un na-farmaano, faasiqo par jinho ne aap ko qatl kar ke Islaam ko tabaah kar diya. Namaazo’n ko Rozo’n ko moattal kar diya. Shariyat ke chalan ko aur ahkaam ko tod diya, Imaan ki emaarat (building) ko dha diya. Aur Qur’an ki aayato’n ko jala diya aur bagawat wo sarkashi mein dhaste chale gaye, aap ke qatl se Rasoolullah (s.a.w.s) mazloom qaraar pa gaye, mazloom bhi aise ke apne bachche ke khoon ka badla na le sake, aap ke qatl se Kitaab-e Khuda par la-waaresi chha gayee. Aap ke sataye jaane se asal mein haq sataya gaya, aap ke na hone se takbeer (Allaho-Akbar) wo tahleel (La ilaaha illal-laah) ki aawazo’n mein koi rooh na rahi. Haraam wo halaal ka imteyaaz, Qur’an aur uske maani ka ta-aiyun sab zaaye ho gaya, aap ke baad shariyat mein khuli huwi tabdiliyaa’n, faasid aqeede se hudood-e shariyat ka ta-attul (useless) nafsaani khwaahisho’n ka zor, gumrahiyaa’n, fitne aur galat cheezo’n ka zahoor huwa.

Garaz-keh aap ki sunaani sunaane wala aap ke Jadde Amjad (s) ki qabr ke paas khada huwa aur aap ki sunaani, baraste huwe aasuwo’n ke saath Rasoolullah (s.a.w.s) ko yeh kahte huwe sunayee keh: Yaa Rasoolullah (s.a.w.s) aap ka farzand, aap ka bachcha qatl kar diya gaya, aur aap ke ghar walo’n aur Jaa-nasheeno’n ko maar diya gaya. Aap ke baad aap ki zurriyat ko qayed kiya gaya, aur aap ki zurriyat wo Ahle bayt (a.s) ko woh dukh diye gaye jin dukho’n se un ko bachana ummat par farz tha. Roohe Islaam intehayee qalaq (shaded dukh) ka shikaar huwa. Aur Aan Hazrat (s.a.w.s) ka qalbe naazuk giryaa’n wo fogaa’n huwa. Malayeka aur Ambiya (a.s) ne unko aap ka pursa diya. Aap ke qatl hone se aap ki maa Fatema Zahra (s.a) be-taab ho gayee’n.

Malayeka-e Moqarrebeen ke ek ke baad ek lashkar utarne laghe, jo aap ke baap Ameerul Momeneen (a.s) ko pursa de rahe thay, aur aala illieen mein aap par nauha wo maatam kar rahe thay. Aap ke gham mein Huraan-e Jannat (Jannat ki Hure’n) apna mooh peet rahi thi, aasmaan aur aasmaan ke ba-shinde aap par roye, aur Jannat ke Khazeena-daar roye, pahaad qataar-dar-qataar roye, dariya aur dariya ki machhliyaa’n, Makkah aur Makkeh ki emaarate’n, Jannat aur Ghilmaan, Ka’ba aur Maqaam-e Ibraheem (a.s) Mash-arul Haraam aur Hill-o-haram sab hi aap ke gham mein ghiryaa’n huwe.

Ay Ma’bood! Us buland martaba maqaam ki hurmat ka waasta Mohammad (s.a.w.s) wo Aale Mohammad (a.s) par durood wo salaam bhej. Aur mujh ko unke garoh mein mahshoor farma, aur unki sifaarish se mujhe daakhile Jannat farma. Ay kam se kam waqt mein har ek ka hisaab karne wale, Ay har buzurgh se kahee’n zeyada buzughtar. Ay Aalim wo Haakimo’n se zeyada zore hukumat rakhne wale.

Waasta Hazrat Mohammad Mustafa (s.a.w.s) ka jo Tere aakheri paigambar aur tamaam aalam ki taraf Tere Rasool hai aur unke bhai ka waasta jo kushada peshani aur ma’dane ilm wo hikmat, aur har ilm mein raasikh (ilm ki gahrayee mein doobhe huwe) hai. Ameerul Momeneen Hazrat Ali ibne Abi Talib (a.s) aur (Rasool ke lakhte jigar dokhtar-e nek akhtar) Hazrate Fatema Zahra (s.a) ka waasta jo Sayyedatun-Nisaail Aalameen hai. Hasane Mujtaba (a.s) ka waasta jo Paak-o-Pakeeza aur parhezgaro’n ki panah-gah hai. Aur Hazrat Aba Abdillah Al-Husain (a.s) ka waasta jo tamaam shaheedo’n mein zeyada buzurgh martaba hai, aur unki qatl hone wali aulaad ka waasta aur unki mazloom zurriyat ka waasta, Ali ibnul Husain Zainul Abedeen (a.s) ka waasta, aur Mohammad ibne Ali Al-Baqir (a.s) ka waasta jo ibaadat-guzaro’n ke qibla hai. Aur Jafar ibne Mohammad (a.s) ka waasta jo mojassam-e sadaqat hai. Aur Moosa ibne Jafar Al-Kazim (a.s) ka waasta jo haq ke daleelo’n ko zahir karne wale hai. Aur Ali ibne Moosa Ar-Reza (a.s) ka waasta jo deen ke madadgaar hai. Aur Mohammad ibne Ali At-Taqi (a.s) ka waasta jo Ahle haq ke peshwa hai. Aur Ali ibne Mohammad An-Naqi Al-Haadi (a.s) ka waasta jo zaahido’n se kaheen zeyada zaahid hai. Aur Hasan ibne Ali Al-Askari (a.s) ka waasta jo Ayemma-e Athar ke waaris hai. Aur Us fard ka waasta jo tamaam khalq (makhluqaat) par Hujjat hai.

Mohammad (s.a.w.s) wo Aale Mohammad (a.s) par durood bhej jo sadeqeen mein behtareen nekiyo’n ke haamil, jinka laqab: Aale Taha wo Aale Yaseen hai. Aur mujhe Qayamat mein aman paane walo’n mein se, saahibaan-e itmenaan mein se, kamiyab hone walo’n mein se, khush-o-khurram Jannat ki basharat paane walo’n mein se qaraar de.

Ay Ma’bood! Mujhe apne farmaan-bardaro’n mein se qaraar de aur soaleheen (pious) se waabasta rakh. Mere baad neki aur bhalayee se mera zikr ho. Jo bagaawat wo sarkashi karne wale hai unke muqabale mein mujhe fatah de, mujhe haasido’n ke sharr se bacha, aur buri tadbeer karne walo’n ki tadbeer ka rukh meri taraf se pher de. Zalimo’n ke haatho’n ko mujh par zulm karne se rok de, aur mujhe mere ba-barkat rehnumawo’n “Mohammad (s.a.w.s) wo Aale Mohammad (a.s)” ke saath Aala illieen mein qaraar de jin par Tu ne ne’mate’n naazil ki. Nabieen (a.s) Siddiqeen, Shohada’a aur Soaleheen (pious) ke saath qaraar de jinko Tu ne ne’mato’n se nawaza apne rahem wo karam se ay sab se zeyada rahem karne wale.

Ay Ma’bood! Tujhe qasam deta hoo’n Tere Nabi-e Masoom ki aur Tere hatmi ahkaam ki aur gunaho’n se bachne ke liye moqarrera (fixed) irshadaat ki, aur is qabre motahhar ki jiski ziyarat ke liye har taraf se Jinn-o-Ins aur farishte pohonchte hai, jiske pehlu mein Imam-e Masoom Shaheed-e zulm-o-sitam (mazloom wo maqtool) aaraam farma rahe hai. Keh mere ranj-o-gham ko dur kar de, aur mere muqaddar ki burayee ko hata de, aur mujhe Jahannum ki aatish-e sazaa’n (jalaane wali aagh) se panah de.

Ay Ma’bood! Mere charo’n taraf apni ne’mato’n ka ambaar (dher) laga de, aur mujhe itna de ke mai’n khush wo khurram rahoon. Mujhe Apne jood-o-karam mein chhupa aur Apni saza wo azaab se dur rakh. Khuda-wanda! Mujhe har lagzish se bacha, mere qaul-o-amal ko durust (perfect) kar. Mujhe umre daraaz (long-life) de, aur bimario’n aur takleefo’n se bacha. Aur mujhe mere peshwa-wo’n ke waseele se aur apne fazl-o-karam se meri behtareen aarzuwo’n (tamannao’n) tak pohncha!

Khuda-wanda! Tu rehmate khaas naazil farma Mohammad (s.a.w.s) wo Aale Mohammad (a.s) par aur meri tauba ko qubool farma. Aur mujhe rota dekh kar rahem farma, mere gunah bakhsh de, mere ranj-o-malaal (gham) ko dur kar, meri khata ko nazar-andaaz (ignore) kar, meri aulaad ko nek aur soaleh (pious) qaraar de.

Khuda-wanda! Is azeemul-martaba shahadat-gah (harame Imam Husain a.s mein) aur is buland maqaam par (meri haazeri ka yeh nateeja ho keh) mujhe yahaa’n se na jaane dena (isse pehle ke) mere gunah bakhsh chuka ho, mere har ayeb ko Tu chhupa chuka ho, mere har gham ko dur kar chuka ho, aur meri rozi mein kashaaish kar chuka ho, mere ghar ke aabaad rahne ka hukm naafiz kar chuka ho, mere bigde huwe kaamo’n ko durust kar chuka ho, meri har aarzu-e dil ko Tu puri kar chuka ho aur meri har dua ko Tu qubool kar chuka ho. Meri har tanghi ko Tu zaayel kar chuka ho, mere har inteshaar ko Tu itmenaan mein badal chuka ho. Mere har kaam ko Tu takmeel tak pohncha chuka ho.

Mere har maal ko Tu zeyada se zeyada kar chuka ho, aur mujhe har khulqe hasan se araasta kar chuka ho, aur mere har sarf (jo kuchh Teri raah mein kharch kar chukka hoo’n) uska badal de kar us kami ko pura kar chuka ho. Aur mere har haasid ko tabaah kar chuka ho. Aur mere har dushman ko halaak kar chuka ho, aur mujhe har sharr se Tu bacha chuka ho, aur mujhe Tu har bimaari se shifa de chuka ho, aur mere har ek apne ko jo dur ho Tu usko qareeb kar chuka ho, aur meri har pareshani ko Tu itmenaan se badal chuka ho, aur meri har maang wo sawaal ko Tu mujh ko ataa kar chuka ho.

Ay Ma’bood! Mai’n Tujh se is duniya ki behtari (khair-o-barkat) aur us jahaan-e-baaqi (aakherat) ke ajr wo sawaab ka sawaal karta hoo’n. Ay Ma’bood! Mujhe Apne halaal ke zariye haraam se, aur Apne fazl-o-karam se tamaam bando’n se be-neyaaz kar de. Khuda-wanda! Mujhe taufeeq de keh mai’n Teri ne’mato’n ka shukriya adaa kar sakoo’n. Aur Apna ehsaan wo karam mujh par zeyada se zeyada farma. Aur mujhe aisa bana de keh sab log meri baat maane. Aur mera har amal Teri baargah mein qubooliyat ki bulandi haasil kare, aur nekiyo’n mein log mere naqshe qadam par chale’n aur mere dushman ko tabaah wo barbaad kar de.

Baare-ilaaha! Tu rehmate khaas naazil farma Mohammad (s.a.w.s) wo Aale Mohammad (a.s) par jo Teri tamaam makhluqaat mein sab se behtar hai, yeh silsila-e rehmat Tera un Hazraat par shab-o-roz (subh-shaam) jaari rahe, aur badmaash shareer logo’n ke moqaabale mein Tu meri himayat farma, aur mujhe gunaho’n ke bojh (weight) aur uske kheyalaat se paak kar de. Aur mujh ko Jahannum (ki aagh) se panah de, aur rahat wo aaraam ke maqaam (Jannat) mein aabaad kar de, aur mujhe aur mere tamaam deeni bhai-bahno’n (momeneen wo momenaat) ko apne rahem wo karam se bakhsh de Ay sab se zeyada rahem karne wale. Parwardigaar Tu rehmat naazil farma Hazrat Mohammad (s.a.w.s) aur unki Aale paak (a.s) par.

aa